वणी टाईम्स न्युज : मारेगाव येथे रविवारी दुपारी घडलेल्या एका धक्कादायक घटनेने संपूर्ण परिसर हादरला आहे. इंजिनिअरिंगचे शिक्षण घेत असलेल्या एका तरुणाने आपल्या घरात गळफास घेऊन आत्महत्या केली. संकेत शशिकांत कोरले (२२) असे मृत तरुणाचे नाव आहे.
शेतकरी कुटुंबातील संकेतच्या वडिलांचे काही वर्षांपूर्वी अल्पशा आजाराने निधन झाले होते. त्यानंतर कुटुंबाची जबाबदारी आईवर आणि संकेतवर आली होती. आई शेतीकाम करून संसाराचा गाडा ओढत होती, तर धाकटी बहीण उमरी येथे नर्सिंगचे शिक्षण घेत आहे. संकेत हा यवतमाळ येथे अभियांत्रिकी शिक्षण घेत होता.
काही महिन्यांपासून तो मारेगाव येथेच वास्तव्यास होता. रविवारी दुपारी घरात कोणीही नसताना त्याने गळफास घेतल्याचे प्राथमिक तपासात समोर आले आहे. कुटुंबातील एकुलता एक मुलगा असलेल्या संकेतच्या अचानक जाण्याने कुटुंबावर दुःखाचा डोंगर कोसळला आहे.
या आत्महत्येमागील कारण अद्याप स्पष्ट झालेले नाही. घटनेची माहिती मिळताच पोलिसांनी घटनास्थळी धाव घेऊन पंचनामा केला असून पुढील तपास सुरू आहे. तरुणाने उचललेल्या या टोकाच्या पावलामुळे गावात हळहळ व्यक्त होत असून सर्वत्र शोकमग्न वातावरण निर्माण झाले आहे.
