वणी टाईम्स न्युज : शहरातील एका मोहल्ल्यात महिलेला आणि तिच्या मुलांना अश्लील शिवीगाळ करून जीवे मारण्याची धमकी दिल्याची घटना 10 जुलै रोजी रात्री 9.30 वाजताच्या सुमारास घडली. याप्रकरणी संबंधित महिलेने वणी पोलीस ठाण्यात नोंदविलेल्या तक्रारीवरून आरोपी तरुणावर गुन्हा दाखल करण्यात आला आहे.
फिर्यादी घरकाम करणाऱ्या महिलेने दिलेल्या तक्रारीनुसार, अनिकेत (वय अंदाजे 25 वर्षे), हा तिच्या घरासमोर येऊन तिच्या मुलीला वारंवार त्रास देत होता. संबंधित युवक मुलीशी बोलत नाही म्हणून शिवीगाळ करत असल्याचे तक्रारीत म्हटले आहे. घटनेच्या दिवशी रात्री आरोपी अनिकेत तिच्या घरासमोर येऊन मुलाला बाहेर बोलावले आणि त्याचवेळी अश्लील भाषा, अश्लील गाणी म्हणत शिवीगाळ केली. तसेच बाईकचा वेग वाढवत रस्त्यावर रेस करून परिसरात गोंधळ घातला. यावेळी तो अत्यंत अश्लील आणि अपमानजनक शब्द वापरत होता. या प्रकारामुळे परिसरात राहणारे नागरिकही रस्त्यावर जमा झाले.
त्यानंतर आरोपीने “तुम्ही घराबाहेर निघा नाही तर जिवे मारून टाकीन” अशी धमकी दिल्याचेही तक्रारीत नमूद आहे. या गंभीर प्रकारामुळे पीडित महिला व तिच्या कुटुंबीयांमध्ये भीतीचे वातावरण निर्माण झाले आहे. संबंधित युवकाविरोधात योग्य ती कायदेशीर कारवाई करण्यात यावी, अशी मागणी पीडित महिलेने केली आहे. तक्रारीवरून पोलिसांनी आरोपी अनिकेत विरुद्ध कलम 296,352 BNS नुसार गुन्हा दाखल करुन अधिक तपास करत आहेत.
