वणी टाईम्स न्युज : निर्जन स्थळी मतीमंद युवतीवर लैंगिक अत्याचार करणाऱ्या नराधम आरोपीला पोलिसांनी बेड्या ठोकल्या आहेत. घटनेच्या आठ दिवसानंतर पोलिसांनी आरोपीला मानकी गाव शेत शिवारातून पाठलाग करून पकडला. राजू पोटे (45) राहणार खरबडा, वणी असे नराधम आरोपीचे नाव आहे. आरोपी हा सराईत गुन्हेगार असून त्याच्यावर जिल्ह्यात अनेक ठिकाणी चोरी व घरफोडीचे गुन्हा दाखल असल्याची माहिती आहे.
पीडित युवती 1 मे रोजी दुपारी निर्गुडा नदी काठावर विट भट्ट्याजवळ विटाचे तुकडे गोळा करण्यासाठी गेली होती. दरम्यान युवतीला एकटी पाहून आरोपीने तिचे तोंड दाबून निर्जन स्थळी झाडाझुडपात नेऊन तिच्यावर अतिप्रसंग व अनैसर्गिक कृत्य केला. घटनेबाबत पीडित युवतीने आपल्या वडिलांना सांगितले. त्यानंतर पोलिसात तक्रार दाखल करण्यात आली. अत्याचार करणाऱ्या आरोपीला दाढी व मिशी असल्याची माहिती पीडितेने पोलिसांना दिली होती. त्यानुसार पोलीस आरोपीच्या शोधात होते.
दरम्यान खबऱ्याकडून मिळालेल्या माहितीवरून वणी पोलीस डी बी पथकाने गुरुवारी मानकी गावाजवळ एका शेताला घेराव घालून दडून बसलेल्या आरोपीला अटक केली. युवतीवर दुष्कर्म केल्यानंतर आरोपीने एका सलूनमध्ये दाढी मिशी काढली होती. नराधम आरोपी राजू पोटे हा रेकॉर्डवरील गुन्हेगार असून त्याच्यावर वणी व इतर ठिकाणी चोरी व घरफोडीचे अनेक गुन्हा दाखल आहे.
