वणी टाईम्स न्युज : वणी येथील तहसील कार्यालयासमोर चहाचे दुकान चालवणाऱ्या आदिवासी समाजातील महिला रिना नंदु जुमनाके यांनी वणी पोलिस ठाण्यातील ठाणेदारावर अत्यंत गंभीर स्वरूपाचे आरोप केले आहेत. जातीवाचक शिवीगाळ, अपमानास्पद वागणूक तसेच चहाचे दुकान फेकून देण्याची व जीवे मारण्याची धमकी दिल्याचा आरोप करत त्यांनी थेट महाराष्ट्र राज्याचे आदिवासी विकास मंत्री मा. अशोक उईके यांच्याकडे लेखी तक्रार दाखल केली आहे.
तक्रारीनुसार, अर्जदार रिना जुमनाके यांचा मुलगा साहील जुमनाके याला काही महिन्यांपूर्वी एका पोलिस अधिकाऱ्याने मारहाण केल्याचा प्रकार घडला होता. त्या प्रकरणी दिलेल्या तक्रारीच्या अनुषंगाने १६ डिसेंबर २०२५ रोजी रात्री वणी पोलिस ठाण्यात बयानासाठी बोलावण्यात आले होते. बयान नोंदवित असताना ठाणेदार तेथे आले व त्यांनी अर्जदारास जातीवाचक, अश्लील व अपमानास्पद शब्द वापरून शिवीगाळ केली, तसेच “तुझे चहाचे दुकान फेकून देईन, तहसीलसमोर दुकान टाकू देणार नाही” अशी धमकी दिल्याचा आरोप आहे.
या घटनेमुळे स्वतःसह मुलाचा शारीरिक व मानसिक छळ झाल्याचे नमूद करत, सार्वजनिक ठिकाणी अपमान केल्याने आणि जीवे मारण्याची धमकी दिल्याने संबंधित ठाणेदाराविरोधात अनुसूचित जाती व अनुसूचित जमाती (अत्याचार प्रतिबंध) अधिनियम १९८९ तसेच भारतीय न्याय संहिता (BNS) अंतर्गत गुन्हा दाखल करण्याची मागणी करण्यात आली आहे.
या प्रकरणाची प्रत मुख्यमंत्री, उपमुख्यमंत्री, पालकमंत्री, विशेष पोलीस महासंचालक (अमरावती विभाग), जिल्हा पोलीस अधीक्षक व जिल्हाधिकारी यवतमाळ यांना पाठविण्यात आली आहे. प्रकरण उघडकीस आल्यानंतर वणी शहरात खळबळ उडाली असून, संबंधित प्रकरणात वरिष्ठ पातळीवरून तातडीची चौकशी व कारवाई होणार का, याकडे सर्वांचे लक्ष लागले आहे.
तक्रार खोटी असल्याचा ठाणेदाराचा दावा
चहा विक्रेत्या महिलेचा मुलगा हा अवैध धंदेवाईकांचा पंटर असल्याच्या संशयावरून पोलिसाने त्याचा मोबाईल ताब्यात घेतला होता. तक्रारदार महिलेला कुठल्याही प्रकारच्या अर्वाच्य भाषा किंवा जातीवाचक शब्द बोललो नाही. मुलाच्या बचावासाठी सदर महिलेने माझ्याविरुद्ध खोटी तक्रार केली आहे.
गोपाल उंबरकर – ठाणेदार, पो. स्टे. वणी
