वणी टाईम्स न्युज: आगामी वणी नगर परिषद निवडणुकीत नगराध्यक्ष पद अनुसूचित जमाती (महिला) प्रवर्गासाठी आरक्षित करण्यात आले आहे. या पार्श्वभूमीवर भारतीय जनता पक्षाकडून प्रभाग क्रमांक १ मधील सौ. भारती बन्सीलाल सिडाम भारतीय जनता पक्षाकडून उमेदवार म्हणून निवडणूक लढण्यास इच्छुक आहे.
भारती सिडाम या वणी महसूल मंडळात कार्यरत असलेल्या तलाठी बन्सीलाल सिडाम यांच्या पत्नी आहेत. बन्सीलाल सिडाम यांचा वणी शहरात दांडगा जनसंपर्क असून, विविध सामाजिक व शासकीय स्तरावर त्यांनी काम करताना एक विश्वासार्ह प्रतिमा निर्माण केली आहे. त्यामुळे त्यांच्या जनसंपर्काचा फायदा पत्नी भारती सिडाम यांना होण्याची शक्यता व्यक्त केली जात आहे.
भारती सिडाम यांनी भारतीय जनता पक्षाकडे उमेदवारी अर्ज दाखल केला असून पक्षाच्या स्थानिक कार्यकर्त्यांमध्ये त्यांच्या नावाची जोरदार चर्चा सुरू आहे. भाजपच्या महिला कार्यकर्त्या तसेच अनुसूचित जमाती प्रवर्गातील मतदार यांच्याकडूनही त्यांना चांगला प्रतिसाद मिळत असल्याचे सांगितले जात आहे.
भाजपकडून नगराध्यक्ष पदासाठी अजून अधिकृत घोषणा झालेली नसली तरी, सध्या भारती बन्सीलाल सिडाम यांचे नाव सर्वाधिक चर्चेत आहे आणि त्यावर पक्षश्रेष्ठींचे अंतिम शिक्कामोर्तब होणार का, याकडे सर्वांचे लक्ष लागले आहे.
